बारसे
सोनुलीच्या आगमनाने
रोज दिवाळी नि दशहरा
मंगल दिन हा सोनियाचा
मंगल क्षण आला घरा ---- १
आई-बाबा आजी-आबा
नवनाते ये आकारा
मंगल दिन हा सोनियाचा
मंगल क्षण आला घरा ---- २
ताई-दादा सांगताती
खेळण्यांची त्वरा करा
मंगल दिन हा सोनियाचा
मंगल क्षण आला घरा ---- ३
फुले नि माळा लेऊनी
दिसे पाळणा गोजिरा
मंगल दिन हा सोनियाचा
मंगल क्षण आला घरा ---- ४
पाळण्याच्या सभोवती
सार्याr मिळुनी फेर धरा
मंगल दिन हा सोनियाचा
मंगल क्षण आला घरा ---- ५
नामकरणाचा सोहळा
करुया आपण साजरा
मंगल दिन हा सोनियाचा
मंगल क्षण आला घरा ---- ६
पेढे बर्फी खाऊनी
तोंड आपुले गोड करा
मंगल दिन हा सोनियाचा
मंगल क्षण आला घरा ---- ७
कीर्तीपताका यशोमतीची
उजळो नील अंबरा
मंगल दिन हा सोनियाचा
मंगल क्षण आला घरा ---- ८
शुभाशीष हा आजी देते
स्मरूनिया त्या रमावरा
मंगल दिन हा सोनियाचा
मंगल क्षण आला घरा ---- ९
Hits: 170