पितृछत्र
Parent Category: मराठी साहित्य
बाबा नाना काका अण्णा
कुणी म्हणती दादा ऽ ऽ ऽ
मामा बापू तसेच डॅडी
कुणी म्हणती नाना - - - १
कुणीही काही म्हणो तरीही
भाव असे साधा ऽ ऽ ऽ
पैसा अडका असो नसो वा
रूप तसे संपदा - - - २
मातपित्याचे छत्र असे हे
शिरावरी जेधवा ऽ ऽ ऽ
हरेक समयी शब्दासचि
त्या अर्थ येतसे नवा - - - ३
उदरभरण अन् पोषण करण्या
कर मातेचा हवा ऽ ऽ ऽ
परि सुशांत नयनामधुनी पित्याच्या
लाभतसे गारवा - - - ४
गोकुळामधि नंदाघरी जव
बाळराज ठेवण्या ऽ ऽ ऽ
धैर्यशील तो कृष्णपिता ती
पार करी यमुना - - - ५
कन्यादाना करीत असता
होति किती यातना ऽ ऽ ऽ
स्मितमुख करूनी वधूपिता तो
आवरितसे भावना - - - ६
सानपणीच हे पितृछत्र मी
हरवुनि की बसले ऽ ऽ ऽ
स्वप्नी तरी ते दर्शन घेण्या
आतुर की जाहले - - - ७
अंधुकशी मज स्मरते अजुनी
उंचनिंच मूर्ती ऽ ऽ ऽ
सतेज घारे हिरवे डोळे
प्रेमळ वदनावरती - - - ८
करुणाघन त्या परमेशाच्या
व्याकुळ मी दर्शना ऽ ऽ ऽ
स्वर्लोकीच्या पित्यास माझी
एकचि ही प्रार्थना - - - ९
— — सौ. शुभांगी सु. रानडे
